Tit 2 | NdeIBE | STEP | Kumele ufundise okuvumelana lemfundiso eqotho.

Titus 2

Okumele kufundiswe amaqembu ehlukeneyo

1 Kumele ufundise okuvumelana lemfundiso eqotho. 2 Fundisa amadoda amadala ukuzithiba, afanele ukuhlonitshwa, azikhuze, njalo aqine ekukholweni, lethandweni kanye lasekubekezeleni.

3 Ngokunjalo, fundisa abesifazana abadala ukuba babe ngabahloniphayo ekuphileni kwabo, bangabi ngabahlebi kumbe babuswe liwayini, kodwa ukuba bafundise okulungileyo. 4 Ngakho bangafundisa abesifazana abatsha ukuba bathande omkabo labantwana babo, 5 ukuba bazikhuze njalo bahlambuluke, lokuba bakhuthale emakhaya, lokuba lomusa, lokuba bazehlisele ngaphansi kwabomkabo, ukuze kungabi khona ogcona ilizwi likaNkulunkulu.

6 Ngokunjalo, khuthaza abesilisa abatsha ukuba bazikhuze. 7 Kukho konke babekele isibonelo ngokwenza okuhle. Ekufundiseni kwakho tshengisa ubuqotho lokuzimisela 8 kanye lokukhuluma okulengqondo okungeke kusolwe ukuze kuthi labo abakuphikisayo bayangeke ngoba bengelalutho olubi abangalutsho ngathi.

9 Fundisa izigqili ukuba zizehlisele ngaphansi kwamakhosi azo ezintweni zonke, zizame ukuwathokozisa, zingawaphenduli,

10 zingawantshontsheli, kodwa zibonakalise ukuthi zingathembeka okupheleleyo, ukuze kuthi ngakho konke zenze imfundiso ngoNkulunkulu uMsindisi wethu ibe ngehugayo.

11 Ngoba umusa kaNkulunkulu oletha insindiso usubonakele ebantwini bonke. 12 Uyasifundisa ukuthi “Hayi” ekweyiseni uNkulunkulu lasezinkanukweni zasemhlabeni, njalo siphile ngokuzikhuza, ngokuqonda empilweni yokulalela uNkulunkulu ngesikhathi samanje, 13 lapho sisalindele ithemba elibusisiweyo – ukubonakala ngenkazimulo kukaNkulunkulu wethu ophakemeyo longuMsindisi, uJesu Khristu 14 owazinikelayo ngenxa yethu ukuba asihlenge ebubini bonke kanye lokuze azihlambululele abantu abangabakhe, abatshisekela ukwenza okuhle.

15 Ngakho, lezi yizinto okumele uzifundise. Khuthaza njalo ukhuze ngamandla wonke. Ungavumeli muntu akweyise.